Қазақстандық теннисші Михаил Кукушкин Australian Open-2021 турниріндегі жарыс жолын аяқтады.
Бірінші айналымда 33 жасар отандасымыз әлемнің үшінші ракеткасы және US Open-2020 чемпионы австриялық Доминик Тиммен ойнады. Матч 2 сағат 40 минутқа созылды және 27 жасар Тимнің пайдасына 7:6 (2), 6:2, 6:3 есебімен аяқталды.
Михаил алғашқы сетте брейкпен есепте алда келе жатқан, бірақ 6-5 бола тұра мүмкіндікті пайдалана алмады. Бірінші сеттің тай-брейкінде қарсыласқа жол берсе де, екінші партияны басымдықпен (2:0) бастады. Алайда еліміздің екінші ракеткасы ойынды бақылаудан шығарып алды да Тим 6 геймді қатарынан ұтты. Үшінші сетте де Кукушкин Тимге лайықты қарсыластық көрсете алмады.
Айта кетерлігі, Кукушкин Australian Open жарысының алғашқы айналымынан ары өте алмауы осымен тоғызыншы рет қатарынан болып отыр. Соңғы рет теннисші бұл межені 2012 жылы бағындырған.