Қазақстандық Андрей Голубев жұптық сында Доха ATP 250 турнирінің финалына өте алмады.
Қазақстандық теннисші франциялық Фабрис Мартенмен бірге жартылай финалда осы доданың 3-ракеткалары, нидерландылық Уэс Колхоф – ұлыбританиялық Нил Скупскимен шеберлік байқасты.
Бірінші партияда нидерландылық-ұлыбританиялық жұп басымдылық танытты – 6:4.
Екінші сетте Голубев пен Мартен 2:0 есебімен алға шыққанымен, сол мүмкіндіктерін пайдалана алмады. Ақыры тай-брейкте Колхоф пен Скупскидің асығы алшысынан түсті – 7:6 (7:3).
Бір сағат 45 минутқа созылған тартысты бәсеке барысында қазақстандық-франциялық жұп 3 эйс жасап, 8 брейк-пойнттың біреуін ғана пайдалана алды. Қарсыластары 3 эйс, 2 брейкке (13 брейк-пойнт) қол жеткізді.
Осылайша А.Голубев жұптық сында жүлде қоры 1 млн АҚШ долларынан асатын жарыстың финалына шыға алмай қалды.