Қазақстанның бірінші, әлемнің 20-ракеткасы Елена Рыбакина Индиан-Уэллс WTA 1000 турнирінің үшінші айналымына шықты.
Жарыстың (жүлде қоры – 8,4 млн АҚШ доллары) 17-ракеткасы болып тіркелген қазақстандық теннисші доданы екінші айналымнан бастап, дүниежүзілік рейтингте 58-орында тұрған бельгиялық Элисон Ван Эйтванкпен кездесті.
Рыбакина сағат жарымға жуық уақытқа созылған матчта қарсыласынан 6:1, 7:5 есебімен басым түсті. Қазақстандық теннисші 3 эйс жасап, 8 брейк-пойнттың үшеуін пайдаланды.
Елена үшінші айналымда әлемнің 17-ракеткасы, осы турнирдің өткен жылғы финалисі, Беларусь өкілі Виктория Азаренко немесе рейтингте 96-орындағы аустралиялық Астра Шарманың біреуімен шеберлік байқасады.