Қазақстандық Бейбіт Жукаев елордада өтіп жатқан ITF M25 турнирінің финалына шықты, деп хабарлайды ҚазАқпарат.
Дүниежүзілік рейтингте 614 орында тұрған Ақтау теннис мектебінің түлегі Жукаев осы жарыстың 6-ракеткасы ретінде финалға дейін төрт кездесуін сәтті өткізді.
Бейбіт жартылай финалда әлемнің 638-інші, турнирдің 7-ракеткасы, сербиялық Хамад Медьедовичпен сынға түсті.
Екі партия да тартысты өрбіп, сет тағдыры тай-брейкте шешілді. Қазақстандық теннисші қарсыласынан 7:6 (7:2), 7:6 (7:3) есебімен басым түсті.
Жукаев финалда рейтингте 482-сатыдағы, осы доданың 3-ракеткасы, ресейлік Алибек Качмазовпен бас жүлдені сарапқа салады.