Қызылордалық «Қайсар» Түркиядағы оқу-жаттығу жиынын аяқтады, деп хабарлайды команданың баспасөз қызметі.
Наурыз айының 2-інде басталған жиында бас бапкер Сұлтан Әбілдаев төрт жолдастық кездесу ұйымдастырып, қаралымға келген футболшылардың әлеуетін байқады.
«Қасқырлар» украиналық «Альянс» (0:0) және Швецияның белді клубы «Эстерсундпен» (0:0) тең түссе, даниялық «Эшой» (0:1) мен ресейлік «Шинникке» (0:3) жол берді.
15 күнге жоспарланған жаттығу жұмыстарында футболшылар физикалық және тактикалық жаттығуларға ден қойды.
Енді «Қайсар» наурыз мерекесі қарсаңында Қызылорда қаласында жиналып, жаңа маусымға соңғы дайындығын пысықтайды.