9 наурыздан 10 наурызға қараған түні Манчестердегі «Этихад» стадионында Чемпиондар лигасының 1/8 финалындағы жауапты ойын аясында «Манчестер Сити» Лиссабонның «Спортингін» қабылдады. Матч 0:0 есебімен аяқталды.
Португалияда өткен алғашқы ойында «қалалықтар» «Спортингті» 5:0 есебімен жеңген болатын. «Сити» сапында Бернардо Силва дубль авторы атанды, Рияд Марез, Филипп Фоден және Рахим Стерлинг бір голдан соқты.
Осылайша екі кездесудің қорытындысы бойынша «Манчестер Сити» турнирдің 1/4 финалына шықты.
Ал параллель өткен матчта «Реал Мадрид» «Пари Сен-Жерменді» қабылдады. Ойын «Сантьяго Бернабеу» стадионында өтіп, 3:1 есебімен алаң иелерінің пайдасына аяқталды.
39-минутта Килиан Мбаппе есеп ашқан еді. Екінші таймда Кәрім Бензема үш бірдей гол соғып, командасына жеңіс сыйлады және матчтың үздік ойыншысы деп танылды.
Қос матчтың қорытындысы бойынша мадридтік клуб 3:2 есебін тіркеп, ширек финалға жолдама алды.