Бейжің Олимпиадасында биатлоннан ерлер арасындағы жекелей сын аяқталды. Қазақстандық биатлоншы Владислав Киреев жарысты 25-ші орынмен аяқтап, Olympic.kz сайтына сұқбат берді.
«Жарыс жақсы өтті. Бейжің ойындары мен қатысып отырған алғашқы Олимпиада. Сондықтан ату кезінде мүлт кетпегенім қуантады. Бұл бәсеке өз мансабымдағы ең сәтті жарыстардың бірі екені анық. Бүгін шаңғым да жақсы сырғыды, сервисшілерге рақмет. Бір сөзбен айтқанда, бәрі де оңтайлы болды.
Бейжіңге келген алғашқы кездері күн қатты суық еді. Бүгін жылыды. Оның үстіне, қатты жел де болған жоқ. Бұл ату кезінде қателеспеуге көмектеседі. Жарыс жолы тым ауыр дей алмаймын. Тек аздап тыныстайтын жер жоқ, трасса негізінен тегіс. Үнемі қозғалыста болу керек. Жалпы алғанда, бәрі де көңілімнен шықты», — дейді Киреев.